Prentmet hefur prentað barnabókina Loðmar sem SALKA forlag gefur út. Höfundarnir, Embla Vigfúsdóttir og Auður Ösp Guðmundsdóttir, sáu bæði um texta og myndir, en þær hafa nýlokið námi í Listaháskóla Íslands og fengu styrk frá Bókmenntasjóði og Rannís til að vinna bókina.

Bókina prýðir orðagnótt ásamt bráðskemmtilegum myndskreytingum og hönnun. Hér er lögð rækt við íslenska tungu á nýstárlegan og spennandi hátt.

Bókin er innbundin, 34 bls. að lengd og unnin í Prentmeti. Katla Rós Völudóttir og Ragnar Már Nikulásson sáu um grafíska uppsetningu og umbrot.

Loðmar er nokkuð sérstakur náungi sem býr á opnu eitt. Hingað til hefur hann ekki hætt sér yfir á næstu opnur en honum vex ásmegin þegar lesandi opnar bókina og er til í að kanna hana með honum. Á hverri opnu hittir Loðmar nýja bókbúa; þar á meðal má nefna Lúpa, hjárænulega sundlaugarvörðinn, mannvitsbrekkuna Gnótt og síðast en ekki síst Gímaldið ógurlega.

Þátturinn Ísland í dag heimsótti Sölku forlag á útgáfuteiti bókarinnar í vikunni á degi íslenskrar tungu 16. nóvember.