Arnaldur Þór Guðmundsson hefur verið ráðinn aðstoðarframkvæmdastjóri hjá Prentmeti Odda
Hann er fjármálahagfræðingur að mennt frá Háskóla Íslands og mun í desember ljúka MBA námi við hinn virta SDA Bocconi háskóla í Mílanó.
Áður en hann hóf MBA-nám starfaði Arnaldur sem sölustjóri hjá Umbúðum & ráðgjöf, og þar á undan í fyrirtækjaráðgjöf Arctica Finance og var sömuleiðis formaður Ungra fjárfesta á Íslandi meðan hann stundaði nám í fjármálahagfræði.
Arnaldur er vel kunnugur starfsemi Prentmet Odda þar sem hann starfaði á hinum ýmsu sviðum fyrirtækisins á yngri árum og hefur verið í varastjórn félagsins á síðustu árum.
Arnaldur Þór er sonur hjónanna Guðmundar Ragnars Guðmundssonar, framkvæmdastjóra fyrirtækisins, og Ingibjargar Steinunnar Ingjaldsdóttur, stjórnarformanns og framkvæmdastjóra mannauðs- og markaðsmála.
Í nýju starfi mun Arnaldur leggja sitt af mörkum í sölu og ráðgjöf auk þess að taka virkan þátt í rekstri og stjórnun fyrirtækisins.
Við bjóðum Arnald Þór hjartanlega velkominn í okkar öfluga lið!
