Heildarlausnir í umbúðum og prentun

Út er komin bókin Íslensk bókavinnsla sem Prentmet Oddi gefur út. Bókin fjallar um bókagerð og prentun sem órjúfanlegan hluta íslensks menningararfs og mikilvægi þess að viðhalda og efla bókagerð á Íslandi. Prentmet Oddi hefur með öflugum vélakosti og reyndu starfsfólki skapað sér stöðu sem leiðandi aðili í bókaprentun á Íslandi. Fyrirtækið leggur áherslu á að þjóna íslenskum bókaútgefendum, menningarstofnunum og félagasamtökum með bókaprentun sem er sniðin að þörfum íslensks markaðar.

Dagatal Prentmet Odda fyrir árið 2026 er komið út. Að þessu sinni er þemað íslenskir fuglar, en ljósmyndarinn Jóhann Óli Hilmarsson fangar þá á einstaklega litríkan og fallegan hátt. Prentgripurinn er Svansvottaður. Jóhann Óli er meðal fremstu fuglafræðinga og fuglaljósmyndara landsins. Hann hlaut Náttúruverndarviðurkenningu Sigríðar í Brattholti á Degi íslenskrar náttúru 16. september 2024 fyrir framlag sitt til náttúruverndar. Hann er höfundur metsölubókanna Lundinn og Íslenskur fuglavísir, sem hafa komið út í um 40.000 eintökum víða um heim. Jóhann hefur lengi lagt áherslu á myndir af fuglum og náttúru í víðum skilningi og er jafnframt formaður Fuglaverndar. Hann hefur haldið fjölda námskeiða, fyrirlestra og myndasýninga, og birtust verk hans víða á alþjóðavettvangi.

Arnaldur Þór Guðmundsson hefur verið ráðinn aðstoðarframkvæmdastjóri hjá Prentmeti Odda Hann er fjármálahagfræðingur að mennt frá Háskóla Íslands og mun í desember ljúka MBA námi við hinn virta SDA Bocconi háskóla í Mílanó. Áður en hann hóf MBA-nám starfaði Arnaldur sem sölustjóri hjá Umbúðum & ráðgjöf, og þar á undan í fyrirtækjaráðgjöf Arctica Finance og var sömuleiðis formaður Ungra fjárfesta á Íslandi meðan hann stundaði nám í fjármálahagfræði.

Í dag lauk Jón Trausti Harðarson, viðskiptastjóri hjá Prentmet Odda, farsælum starfsferli eftir 51 ár í prentgeiranum. Hann hóf störf hjá Odda árið 1986 og hefur verið ómissandi hluti af fyrirtækinu, sem nú ber nafnið Prentmet Oddi. Af þessu tilefni var haldið hlýlegt kveðjukaffi í höfuðstöðvum fyrirtækisins með samstarfsfólki. Þar var farið yfir glæsilegan feril Jóns Trausta og sú mikla reynsla sem hann skilur eftir sig í greininni. Jón Trausti ætlar að verja næstu árum í að sinna fjölskyldu og áhugamálum, spila á bassann sinn, iðka golf, syngja í kór og ferðast með eiginkonunni, jafnvel að bæta við sig fleiri tungumálum auk þess að njóta samvista við barnabörnin. Við þökkum Jóni Trausta fyrir frábært samstarf og samfylgd í gegnum árin og óskum honum velfarnaðar og hamingju á komandi tímum.